Uz njega smo se smijali do suza, plakali, pjevali ili jednostavno bez daha uživali u nepresušnom talentu.
Legendarni Vilijams (63) izgubio je u ponedjeljak bitku sa teškom depresijom, i prema nezvaničnim informacijama, izvršio je samoubistvo u svojoj kući u blizini San Franciska. Podsjetimo se ovog jedinstvenog glumca, koji je igrao crtane ili "prave" likove, smješne, tužne, zastrašujuće, ali uvijek – nezaboravne.
Podsjetićemo vas na Pitera koji mora da otkrije da je njegovo pravo prezime Pan, na gospođu Dautfajer koja u metrou krije dlakave noge, na raspjevanog duha i mnoga druga filmska dostignuća ovog glumca, ali i na njegov uspjeh u živim nastupima, kom su klicale pune hale širom Amerike. Lista fantastičnih uloga Vilijamsa je hronološka, ne možemo nijedno od ovih izvođenja da stavimo iznad ili ispod nekog drugog.
Vilijams je u karijeri tri puta bio nominovan za Oskara za glavnu mušku ulogu, ali ga nikada nije osvojio. Nagrađen je jedinim Oskarom za sporednu rolu u filmu "Dobri Vil Hanting", a osvojio je i dva Emija, četiri Zlatna globusa, dvije nagrade Udruženja glumaca (SAG) i pet Gremija.
Mork i Mindi
Serijom u kojoj igra vanzemaljca Vilijams se probio na malim ekranima. Glumio je Morka, koji je na Zemlju stigao sa planete Ork u svemirskom brodu u obliku jajeta. Serija je emitovana od 1978. do 1982, i donijela mu je prvu nominaciju za Emi za glavnu ulogu u komičnoj seriji.
Stend ap
Ako volite stend ap komediju, koja je i kod nas sve popularnija, nastupi Vilijamsa prava su poslastica! Imao je nekoliko turneja počevši od sedamdesetih po Americi, a najpoznatija među njima je niz nastupa na Brodveju 2002.
Za ovu seriju stend apova, karte su bile rasprodate samo pola sata po puštanju u prodaju. Pogledajte zašto.
Dobro jutro, Vijetname!
Čik pročitajte ovu rečenicu normalnim glasom, a ne onako otegnuto, dramatično kao Vilijams? Film je snimljen po doživljajima vojnog disk-džokeja Ejdrijena Kronauera, koji je tokom Vijetnama pokušavao da preživi rat, pronađe prijateljstvo i izbori se sa licemerjem svojih pretpostavljenih. Najveći dio Vilijamsovih monologa na radiju bio je improvizovan. Uloga DJ-a donijela je Vilijamsu prvu nominaciju za Oskara, a mnogi i dan-danas tvrde da je trebalo da ga osvoji on, a ne Majkl Daglas za film "Vol strit".
Društvo mrtvih pjesnika
Uštogljeni internat "potresa" dolazak šašavog, zabavnog profesora književnosti koji želi da inspiriše đake svojim neobičnim metodama. Završna scena, u kojoj učenici na stolovima iskazuju svoju ljubav prema profesoru, nikoga ne ostavlja ravnodušnim.
Kuka
Piter Bening je usvojen kao dijete, a sada živi kao uspješan biznismen, koji nema dovoljno vremena za svoju djecu. Kada sa porodicom za praznike ode u London kod svoje usvojiteljke Vendi, čudne stvari počnu da se dešavaju, i kulminiraju otmicom njegove djece. Vendi mu otkriva - klince je odveo kapetan Kuka, jer želi konačni obračun u Nedođiji sa njim, Petrom Panom. Bening mora da odbaci život poslovnog čovjeka i vrati se svom unutrašnjem djetetu, kako bi iz šake i kuke svog najvećeg neprijatelja spasao svoju djecu.
Aladin
Kada je Diznijev Aladin upao u pećinu, pronašao lampu i protrljao je, nije mogao ni da sanja šta će iz nje izletiti. Vilijams kao luckasti, raspjevani Duh, oduševio je čitave generacije klinaca (mada mu i odrasli teško odoljevaju), i čak i više od 20 godina kasnije, Duh je jedan od omiljenih likova iz Diznijevih filmova. Film je osvojio dva Oskara, za najbolju originalnu muziku i pjesmu - začudo, ne pjesmu u kojoj Duh pjeva, već za romantičnu "A whole new world". Vilijamsu je za pozajmljivanje glasa genijalnom Duhu uručeno specijalno priznanje na dodjeli Zlatnih globusa.
Gospođa Dautfajer
Vilijams je u ovom filmu igrao razvedenog čovjeka, koji smišlja "ludi" plan kako da više vremena provodi sa svojim klincima. Njegova bivša daje oglas za dadilju, a otac se, uz pomoć šminke, maske i kostima, javlja na oglas kao gospođa Dautfajer, fina starija gospođa iz Škotske spremna da pazi na troje malih "divljaka". Za 2015. je bila najavljena premijera nastavka filma.
Veridba
U rimejku italijanske komedije, koji liči na još luđu verziju filma "Meet the Fockers", Vilijams je igrao vlasnika "drag" kluba. Njegov sin se ženi, pa je konzervativnoj porodici njegove vjerenice rečeno da Vilijams radi u inostranstvu i da mu je žena domaćica, dok zapravo drži klub a njegova "žena" je Albert, koji svake večeri u klubu nastupa prerušen u ženu. Zakazano je upoznavanje porodica…
Dobri Vil Hanting
Film koji je famozno lansirao Meta Dejmona i Bena Afleka u zvijezde donio je i jednu od poznatijih Vilijamsovih "ozbiljnih" uloga. Igrao je terapeuta, koji mladom geniju pomaže da uspostavi odnose sa okolinom i jednom djevojkom. Seanse terapeuta i mladog matematičara važe za kultne filmske scene.
Nesanica
U filmu Kristofera Nolana imamo riijetku priliku da vidimo Vilijamsa u ulozi negativca. U gradiću na Alasci, detektivi istražuju ubistvo tinejdžerke, a ubrzo se kao glavni osumnjičeni izdvaja lokalni pisac krimića, koji jednom od detektiva nudi da sklope bizarni pakt. U ovom rimejku istoimenog norveškog trilera, Vilijams i Al Paćino su maestralni, i "Njujork post" nazvao je "Nesanicu" filmom u kom su dali svoje srce na način na koji godinama nisu.
