Više diktatora u zemljama sjeverne Afrike i Bliskog istoka u poslednje vrijeme našlo se na udaru pravde, uključujući i libijskog lidera Gadafija
Protiv egipatskog predsjednika Hosnija Mubaraka odranije je u njegovoj zemlji otvoren sudski postupak, a na udaru su se već našli i lideri Tunisa, Obale Slonovače i Jemena.
Na konferenciji za novinare u Hagu tužilac Moreno- Okampo je potvrdio da je zatražio da se izdaju nalozi za hapšenje, pored Gadafija, i njegovog sina Saifa al- Islama , kao i šefa obavještajne službe Abdulaha al -Sanusija zbog "široko rasprostranjenih i sistematskih napada na civile" i zločina protiv čovječnosti.
Sudije Međunarodnog krivičnog suda u Hagu treba da se izjasne da li će izdati nalog za hapšenje Gadafija, javile su agencije.
Moreno- Okampo je uvjeren da postoji osnova za podizanje optužnice protiv Gadafija i njegovih najbližih saradnika jer je samo u februaru u Libiji ubijeno 500 do 700 ljudi.
U Tripoliju su unapred rekli da će ignorisati odluku tužioca i sudija MKS u Hagu pošto Libija, kao i mnoge afričke zemlje i SAD, nije potpisala Rimski statut o osnivanju MKS u Hagu.
Bišem predsjedniku Egipta Mubaraku, koji se nalazi u kućnom pritvoru, prijeti smrtna kazna, a istraga je pokrenuta i protiv njegova dva sina i supruge zbog zloupotrebe državnog novca.
"Ukoliko se dokaže da je izdao naređenje da se puca u demonstrante, Mubarak bi mogao biti osuđen na smrt", izjavio je ministar pravde Mohamed al Guindi, prenijele su lokalne novine. U Egiptu, u nemirima prije Mubarakovog pada 11. februara, ubijeno je najmanje 840 demonstranata.
Vlastodršci u nekoliko država u Africi i na Bliskom istoku našli su se pod sudskom istragom, iako su, decenijama, sve do sada, bili nedodirljivi.
Bivši predsjednik Tunisa Abidin Ben Ali i njegova supruga optuženi su za kovanje zavjere protiv bezbjednosti države, podsticanje nereda, ubijanje i pljačkanje, saopštilo je ministarstvo pravde te zemlje, prenijele su agencije.
Ben Ali je 14. januara prebjegao u Saudijsku Arabiju zajedno sa svojom porodicom i velikim bogatstvom. Vlasti te afričke zemlje su za njim raspisale potjernicu i sada traže od Rijada da ga izruče kako bi mu se sudilo u Tunisu.
Savjet Ujedinjenih nacija za ljudska prava imenovao je tri nezavisna stručnjaka koji će voditi istragu o zločinima predsjednika Obale Slonovače Lorana Gbagboa. Oni će istražiti nasilje koje je počelo poslije predsjedničkih izbora 28. novembra prošle godine. UN su navele da je u nasilju u Obali Slonovače od decembra poginulo 800 ljudi i da je bilans žrtava najvjerovatnije mnogo veći, javljaju agencije.
Opozicija u Jemenu traži da se sudi i predsjedniku te zemlje Ali Abdulahu Salehu.
U ovim slučajevima, optužbe su gotovo istovjetne: diktatori se sumnjiče za mnoge zloupotrebe tokom višedecenijske vladavine i za nemilosrdni obračun sa političkim protivnicima.
(Tanjug)