Jedan državljanin Srbije uhapšen je i optužen u Plzenu zbog prodaje oružja i plastičnog eksploziva kriminalcima, saopštila je češka policija.
Jedinica češke policije za suzbijanje organizovanog kriminala navodi da je riječ o pedesetdevetogodišnjaku ali detalji se "ne smiju objaviti".
Za krivično djelo prodaje oružja i eksplozivnih sredstava prijeti kazna od osam godina zatvora.
"Policija je u aprilu dobila informacije da neko nudi kriminalcima na prodaju veće količine eksploziva i detonatora. Za relativno kratko vrijeme detektivi su uspjeli da dobiju informacije o tome ko je čovjek koji nudi 'vruću robu' ", kazao je portparol policije Pavel Hantak.
Predstavljajući se kao kupci, detektivi su stupili u vezu sa njim i juna od njega kupili 5,5 kilograma eksploziva TNT (popularnog dinamita), 2,5 kilograma "semteksa" (plastičnog eksploziva) i dva automata bez fabričkog broja, sa municijom.
Specijalci češke policije uhapsili su ilegalnog preprodavca ekslpoziva i oružja 5. oktobra. Pri pretresu su zaplijenili veću količinu municije.
(Beta)