Pozorišno - plesni spektakl, pod nazivom "In-I", priča je o odnosu muškarca i žene i vječitoj tajni zvanoj “ljubav”
Plesni komad francuske glumice Žilijet Binoš i britanskog plesača i koreografa Akrama Kana biće premijerno izveden sredinom septembra u Londonu.
"Grci imaju 14 riječi za 'ljubav'... Odatle smo krenuli", kazala je na konferenciji za novinare u Londonu francuska oskarovka, koja nije željela da otkrije mnogo detalja o komadu "In-I", pozorišnom plesnom spektaklu čija je premijera zakazana za 18. septembar u Nacionalnom teatru u Londonu.
"Govori o odnosu između muškarca i žene. Zašto moramo da budemo toliko bliski, a da ipak ne uspijemo da se približimo", dodala je.
Žilijet Binoš (44) nastupiće na sceni sa 33-godišnjim Kanom, poznatom po spoju zapadnjačkog savremenog plesa i indijskog klasičnog plesa kataka.
Kan je u karijeri saradjivao sa poznatom plesačicom Silvi Gilem, vajarima Entonijem Gormlijem i Anišom Kaporom i kompozitorom Nitinom Sonijem.
Kapor i Soni radili su i na novom spektaklu - dobitnik Tarnerove nagrade 1991, Kapor je uradio scenografiju, a Soni muziku.
Poslije Londona, komad će biti izveden u Luksemburgu, Italiji, Belgiji i Francuskoj, a potom i u Kanadi, Ujedinjenim Arapskim Emiratima, Japanu, Australiji, Južnoj Koreji i SAD.
U nekim od gradova na programu turneje, uključujući London i Pariz, biće upriličena i retrospektiva 25 godina filmske karijere Žilijet Binoš, uz izložbu njenih slika, autoportreta i portreta režisera sa kojima je saradjivala.
(Beta-AFP)
