Nemiri u arapskim zemljama ne prestaju zbog filma u kome se vrijeđa prorok Muhamed, a danas je francuski satirični list objavio i njegove karikature.
Francuski satirični magazin "Šarli Ebdo" danas je objavio karikature proroka Muhameda, što bi moglo da još više razbjesni muslimane koji širom svijeta protestuju zbog antiislamskog američkog filma.
Na naslovnici magazina prikazan je musliman u invalidskim kolicima kojeg gura ortodoksni Jevrejin, a ispod karikature napisano je "Nedodirljivi 2", što se odnosi na nagrađeni francuski film o siromašnom crncu koji pomaže aristokrati kvadriplegičaru, prenijela je agencija AFP.
U magazinu je na poslednjoj strani prikazan goli prorok Muhamed, a ta karikatura je inspirisana scenom iz francuskog filma sa Brižit Bardo, iz 1963. godine.
Veb stranica magazina "Šarli Ebdo" danas je oborena pošto su stizali komentari u ogromnom broju, od pohvala do negodovanja i kritika.
Urednik magazina, prvobitno karikaturista koji koristi ime Šarb, juče je najavio da će karikature "šokirati one koji žele da budu šokirani".
Šarb je odbacio tvrdnje da namjerno provocira u složenom trenutku, upitavši "da li je sloboda štampe provokativna?".
"Ja ne tražim od muslimana da čitaju magazin, kao što ni ja ne idem u džamiju da slušam govore koji su u suprotnosti sa svim onim u šta ja vjerujem", naglasio je Šarb.
Francuske vlasti pojačale su stepen bezbjednosti oko svojih ambasada u zemljama u kojima bi moglo doći do neprijateljskog raspoloženja zbog objavljenih karikatura proroka Muhameda, izjavio je danas francuski ministar spoljnih poslova Loren Fabijus.
Francuski muslimanski savjet, glavno tijelo muslimanske populacije u Francuskoj, poručio je muslimanima da ostanu mirni u vezi "novog čina islamofobije", a isti poziv muslimanima je uputio i visoki predstavnik pariske najveće džamije Dalil Bubaker.
U Francuskoj živi četiri miliona muslimana.
(Tanjug)