Ajkula u Španiji ujela je kupača za stopalo u plićaku.
Ajkula u Španiji napala je kupača kad je jurila za ribom. Opasna životinja se sudarila sa muškarcem, pa mu je zarila zube u stopalo. Kako se navodi, on je stajao u plićaku.
Muškarac je napadnut na plaži Rabdels koja se nalazi u opštini Oliva južno od Valensije. Kako se navodi, more je odmah postalo crveno. Vlasti su naredile zatvaranje svih plaža duž obale u blizini koje se nalaze i ostrva Majorka, Menorka i Formentera. Napadnuti kupač je za regionalne novine Las Provinsijas rekao da je video sijenku u moru, zatim osjetio udarac na lijevoj nozi, a onda i ugriz u desno stopalo.
"Nije bilo vremena za strah. Primijetio sam krv, pa sam ušao dublje u more da ne uzbunim sve", rekao je on. Britanski Dejli mejl navodi da se radi o lokalnom stanovniku. Nakon svega je ipak izašao iz mora i potražio ljekarsku pomoć. Stručnjaci su proučili uzorak ugriza na njegovom stopalu i utvrdili da je riječ o modrulju (plavoj ajkuli).
Blue shark bites a swimmer in Spain causing confusionhttps://t.co/w6r7JxtaWAvia@MajorcaDaily
— Majorca Daily (@MajorcaDaily)August 19, 2023
Plaže su opet otvorene dan kasnije, nakon što su stručnjaci, zdravstvene vlasti i policijske snage bili sigurni da životinja više ne predstavlja prijetnju po ljude. Morski biolozi poručuju i da ljudi inače nisu dio ishrane modrulja. "Ove vrste ne žele ništa od nas. Traže ribu, a ne ljude. Vjerovatno je bio bolestan ili dezorijentisan. Plićak im inače nije prirodno okruženje", kazao je morski biolog Haime Penandes.