Poslanici DF-a sjutra će, izvjesno je, prisustvovati Kolegijumu predsjednika Parlamenta čime će, bar i na kratko, prekinuti bojkot.
Predsjednik Parlamenta Ranko Krivokapić kaže da SDP ostaje pri stavu da je kandidatura Filipa Vujanovića neustavna. Pojasnio i zašto je prisustvovao Vujanovićevom polaganju zakletve:
"Nama je država ispred partije i ispred svega. Tamo sam branio ustavnu poziciju predsjednika Skupštine i obavljao svoju dužnost. Partija je donijela pravednu i legitimnu političku odluku jer nešto što je formalno pravno, ne znači da je politički legitimno. Mi i dalje mislimo da izbori nijesu bili politički legitimni i da su pravno sporni."
Da su izbori pravno sporni, mišljenja su i u Demokratskom frontu. Poslanici te partije zato već mjesec ne prisustvuju skupštinskim sjednicama, što bi se, međutim moglo promijeniti koliko je sjutra.
Za Antenu M šef poslaničkog kluba DF-a Goran Danilović kaže izvjesno je da će na sjednicu Kolegijuma u četvrtak, doći dva predstavnika Demokratskog fronta:
"Dakle ove sedmice će biti kolegijum predstavnika parlamenta na kojem će se izvjesno pojaviti i naš predstavnik odnosno ja kao šef kluba poslanika. Naravno sigurno će tu biti i kolega Branko Radulović, potpredsjednik Parlamenta jer se radi o prijedlogu Zaključaka, prijedlogu zakona o inicijativama koje smo mi obećali građanima na velikom protestnom skupu a koje su sada došle na red. Potpuno je jasno da ono što smo obećali građanima ćemo pokušati da uvrstimo u dnevni red parlamenta i da se izborimo za usvajanje svega što smo predložili."
Danilović ponavlja da će predstavnici fronta biti prisutni na sjednicama kada na dnevnom redu bude lex specijalis:
«Potpuno je bilo jasno da ćemo onoga trenutka kada se izborimo u razgovorima sa drugim političkim subjektima da naši prijedlozi koje smo obćali građanima na protestu, da ćemo tim povodom vrlo namjenski biti u Parlamentu. Bilo bi nedopustivo da predložimo lex specijalis i da predložimo zaključke u kojima hoćemo trajno da dođemo do poštenih izbora a da se tim povodom ne pojavimo u Parlamentu. Vidjećemo kako će proći naše inicijative a onda ćemo analizirati kako smo time zadovoljni.»
Podsjetimo, dolaskom na sjednicu Kolegijuma poslanici DF-a prvi put nakon mjesec prisustvovali bi nekoj od sjednica u Parlamentu.
(MONDO)