Zvezda je uspjela da savlada lidera šampionata, nanese mu prvi poraz ove sezone i tako se približi vrhu tabele.
Sada je razlika samo dva boda između "vječitih" rivala!
Najavljivan je 166. "vječiti" derbi kao meč koji bi mogao mnogo toga da riješi u trci za titulu, a glavni utisak nakon susreta je da borba za trofej sada tek počinje! Crvena zvezda savladala je Partizan pred rasprodatim stadionom "Rajko Mitić" i približila se najljućem rivalu na samo dva boda zaostatka.
CRVENA ZVEZDA - PARTIZAN 2:0 (2:0)
/Ohi 30, Katai 43/
Ekipa Dejana Stankovića uspjela je da nanese Partizanu prvi poraz u Superligi ove sezone i tako unese daleko veću neizvjesnost u vrh tabele srpskog šampionata. I to snažnom partijom u prvom poluvremenu.
Tih uvodnih 45 minuta bilo je ono čemu su se svi u Zvezdi nadali. Bili su ofanzivniji kao ekipa koja je morala da "krene" po pobjedu, stvarali su prilike i na kraju ih i koristili.
Kvinsi Menig je prvi imao pravu veliku šansu na ovom derbiju pred golom Zvezde, nije dovoljno dobro šutirao, a nedugo nakon toga, tok meča otišao je na potpuno drugu stranu. Ohi Omoižuanfo je iskoristio grešku golmana Aleksandra Popovića i natrčao na ispuštenu loptu da zatrese mrežu.
I kako to u derbiju obično biva - gol je domaćima "dao krila". Postali su još uvjereniji u svoj plan igre, Partizan je bio anemičan i sa skoro nepostojećim veznim redom, naročito u pravcu ka golu Zvezde.
To je Stankovićev tim i iskoristio pred odlazak na odmor. Srnićeva ubačena lopta se par puta odbijala od igrače Partizana, a došla je pravo na nogu Aleksandru Kataiju koji je snažnim udarcem duplirao prednost.
Već tada je bilo jasno da će Partizan imati težak posao u nastavku. Stanojević je izmjenama na poluvremenu "priznao" da je izbor startne postave bio pogrešan. Napravio je tri izmjene, ali ni ulasci Jevtovića, Markovića i Živkovića nisu mogli da donesu dovoljno.
Partizanova igra u napadu nije bila na nivou, Stanojević je frustrirano mijenjao i glavne uzdanice Kvinsija Meniga i Rikarda Gomeša, ali ništa nije pomagalo. Zvezda je bez problema privela meč kraju i uspjela da ozbiljno zakomplikuje trku za titulu.
Prvenstvo sada tek počinje - razlika je dva boda, a do kraja je ostalo još 13 kola!