Novim zakonskim rješenjima uspostavili smo visoke standarde stručnosti javnih izvršitelja, kazao je potpredsjednik Vlade i ministar pravde Zoran Pažin
Crnogorski građani danas s pravom očekuju visok stepen stručnosti, odgovornosti i efikasnosti od svih profesija u pravosudnom sistemu, saopštio je potpredsjednik Vlade i ministar pravde Zoran Pažin na otvaranju konferencije „Profesionalno ponašanje i odgovornost javnih izvršitelja“ danas u Budvi.
„Zato je ispunjavanje ovih legitimnih očekivanja građana jedina prava mjera uspješnosti rada svih profesija u pravosudnom sistemu, kao i uspjeha ukupne reforme pravosudnog sistema,“ naglasio je potpredsjednik.
Ukazao je na ključnu ulogu javnih izvršitelja u ostvarenju prava i zadovoljenju pravde, dodajući da široke nadležnosti javnih izvršitelja upućuju na posebnu važnost njihovog odgovornog i profesionalnog postupanja.
Potpredsjednik Pažin je podsjetio da su posljednjim izmjenama i dopunama Zakona o javnim izvršiteljima ustanovljeni visoki standardi stručnosti za javne izvršitelje, koji moraju položiti i pravosudni i javno-izvršiteljski ispit da bi se mogli baviti ovom značajnom djelatnošću.
Pozdravio je nedavnu odluku Komore javnih izvršitelja da unaprijedi Etički kodeks javnih izvršitelja i uskladi ga sa međunarodnim standardima u ovoj oblasti.
Naglasio je da javni izvršitelji moraju u svakom predmetu, prilikom preduzimanja bilo koje radnje izvršenja ili obezbjeđenja, pokazati visok nivo profesionalizma i odgovornosti koji se od njih i očekuje.
„Jedino stučnim, odgovornim i efikasnim radom javni izvršitelji, baš kao i pripadnici ostalih profesija u pravosuđu, mogu zavrijediti povjerenje građana i privrede i dati svoj puni doprinos razvoju i napretku crnogorskog društva,“ zaključio je potpredsjednik.