Zdravko Čolić reagovao je na društvenim mrežama zbog srpske predstavnice na Evroviziji, Teya Dore.
Pjesma Evrovizije će ove godine biti održana u Malmeu u Švedskoj od 7. do 11. maja, a Srbiju će predstavljati Teya Dora s numerom "Ramonda". Zbog ovog događaja reagovala je i najveća muzička zvijezda na Balkanu Zdravko Čolić.
On se oglasio na Instagramu gdje je sve pozvao da glasaju za srpsku predstavnicu. Ovakve apele izbjegava da upućuje putem društvenih mreža, pa je ovo sve iznenadilo.
"Pozivam sve svoje prijatelje iz inostranstva da sjutra, 7. maja, podrže mladu predstavnicu Srbije u prvoj polufinalnoj večeri na 'Evroviziji', ona nastupa pod brojem 2! Sretno, Teya Dora!", naveo je čuveni Čola.
Čola je podijelio i link za glasanje na festivalu.
Teya Dora će svoju takmičarsku numeru "Ramonda" predstaviti pod rednim brojem 2. Drugo polufinalno veče zakazano je za 9. maj, dok će se finale održati u subotu, 11. maja. Nakon održanog preliminarnog polufinalnog žrijeba određen je optimalan raspored koji će omogućiti svakoj numeri da zasija tokom svoja tri minuta.
Na kladionicama je napetije nego ikad, a na prvom mjestu i dalje se nalaze komšije - hrvatski predstavnik Baby Lasagna. Iako ga je Švajcarska na kratko "skinula" sa trona, Hrvati su uspjeli da se vrate na prvo mjesto i trenutno imaju najveće šanse za pobjedu.